Desde a súa casa en Zahara de los Atunes, en Cádiz, Andrés Sorel, na actualidade secretario xeral da Asociación Colexial de Escritores Españois, foi testemuño directo dos intentos de centos de inmigrantes africanos por alcanza-la costa española. 

      "Ser testemuña da monstrosidade que se fai con esta xente, as miñas viaxes a Ceuta e Marrocos, as lecturas de libros árabes, e investigacións en prensa, leváronme a tomar un compromiso para poder converte-la miña angustia en testemuño'', explicou onte o autor durante a presentación do libro. 

      En Las voces del Estrecho, editado por Muchnik, o autor acerca ó lector uns feitos que cada vez son máis cotiáns e máis terribles e que, segundo el mesmo precisou, "cada vez son máis indiferentes á sociedade atrapada no mundo do espectáculo, da imaxe e da suplantación''. 

      "Intentei —continúa— face-las mil e unha noite daqueles que nunca saberemos quén son, dos que non teñen voz pero si unha vida detrás, nun relato coral construído como unha orquestra de voces'', matizou o escritor.